سیالکوٹ (وطن نیوز) — معروف ٹک ٹاکر مسٹر پتلو (محمد انصر) کی مہندی کی تقریب میں بھگدڑ مچنے سے ایک شخص جاں بحق جبکہ 13 زخمی ہو گئے۔
ڈسکہ روڈ پر فراز اسپورٹس اسٹیڈیم میں گزشتہ روز ہونے والی تقریب میں انعامی قرعہ اندازی کا اہتمام کیا گیا تھا جس کے باعث بڑی تعداد میں لوگ اسٹیڈیم کے باہر جمع تھے۔ داخلی دروازہ کھلتے ہی دھکم پیل شروع ہو گئی اور کئی افراد گر کر کچلے گئے۔
ریسکیو 1122 کی ٹیمیں فوری طور پر موقع پر پہنچیں اور زخمیوں کو علامہ اقبال میموریل ٹیچنگ اسپتال منتقل کیا گیا۔ اسپتال حکام کے مطابق 30 سالہ عقیل، جو بڑھا گورایہ کا رہائشی تھا، زخموں کی تاب نہ لاتے ہوئے دم توڑ گیا۔ زخمیوں میں ریحان ارشد، رفیق، علی ظفر، اعظم، یاسر، منور علی، ارشد، راشد، سرفراز، دانش، ریحان رفاقت، ذوالفقار اور علی شامل ہیں۔
حادثے کے بعد تقریب کا بقیہ حصہ منسوخ کر دیا گیا۔
رپورٹ: رضوان چوہدری
