ملتان (وطن نیوز) — جنوبی پنجاب میں سموگ کی صورتحال مزید بگڑ گئی۔ پیر کی رات ملتان کا ایئر کوالٹی انڈیکس (اے کیو آئی) 795 تک جا پہنچا جس کے بعد شہر پاکستان کا آلودہ ترین شہر بن گیا جبکہ بہاولپور میں بھی اے کیو آئی 447 ریکارڈ کیا گیا۔
آئی کیو ایئر کے مطابق بہاولپور میں باریک ذرات (پی ایم 2.5) کی مقدار عالمی ادارہ صحت کی سالانہ حد سے 60 گنا زیادہ ہے۔ پیر کی صبح بھی ملتان کا اے کیو آئی 655 تھا۔
پنجاب حکومت کا اندازہ ہے کہ فضائی آلودگی 10 نومبر تک بلند رہے گی جبکہ 11 نومبر سے موسم میں تبدیلی کے ساتھ کچھ بہتری متوقع ہے۔ محکمہ موسمیات کے مطابق 13 نومبر تک پنجاب میں بڑے پیمانے پر بارش کا امکان نہیں، اس لیے سموگ سے جلد نجات مشکل ہے۔
یاد رہے کہ 5 نومبر کو بھی ملتان کا اے کیو آئی 374 اور بہاولپور کا 350 ریکارڈ کیا گیا تھا۔
رپورٹ: رضوان چوہدری
